بقلم الرائع أ/طارق تاج////

صباح الحزن يا سادة..

صباح المُر بزيادة..

صباح أشلاء كما العادة..

صباح بالدم متلون..

ولا بيحصل حاجة تِهَوِن..

و داسوا علينا سجادة..

صباح الجرح ينزف عار..

وناس عايشاها باستهتار..

صحيح غزة دي ولَّادة..

وناس عَرَبتها فابريكا..

وناس تسجد لامريكا..

وسَجْدِتهم ليها عبادة..

صباح دخان يغطي الشمس..

إحنا النهاردة وألا الأمس..؟

ماهي كل حاجة متعادة..

صباح بيصحا مش قادر..

صباح برصاص عدو غادر..

يدوسوا علينا ببيادة..

وغل دَفين وشيفينه..

و وش الغول وكشفينه..

ودي مش حرب دي إبادة..

صباح غزاوي بيعافر..

ويتحدي عدو كافر..

وإحنا بنشجب وبندد

بكل حماس و بإرادة..!!

صباح اسود علي البُعَدا..

صباح زغاريد علي الشهدا..

وجنة كلها سعادة..

صباح هيجي يجبُرنا..

ووعد الحق مهما طال هينصرنا..

وهيكون لينا علي فلسطين هنا سيادة..

صباح هيجي ويعطر..

بنصر الله وهيمطر..

يا أما نصر يا شهادة..

بقلم طارق تاج الذي ينزف