حفيدي حبيبي (٢)*****
سألني في يوم حفيدي،،
فين شعرك الأبيض ياتيته
ضحكت من قلبي
وقلت موجود يا قلب تيته
سألني فين هو***
أنا شايف شعر أسود
وجدو عنده شعر أبيض
أنت ودتيه فين ياتيته
قلت له تعالي بس
في حضني
وأنا أحكيلك حكايتي
أخدت حفيدي في حضني
وبوسته على خده المكلبز
وقلت له،،،
أنا كنت صغيرة زيك
وكان ليه طفاير طويلة حلوة
وكنت جميلة وباضحك زيك
كبرت أكتر وبقيت عروسة
عقبال ماشوفك قمر منور
ومع الزمن كبرت حبه
زعلت حبه شعري أبيض شوية
قصيته شوية طويلته شويه
المهم يا روح قلب تيته
شالت الأيام وحطت فيه
وأنا بأكبر ومش واخدة بالي
وعمري بيجري بسرعة
جيت في يوم
بصيت في مرايتي
لقيت عيوني مدمعة
والدموع عمالة تنزل تجري
وضحكتي اللي على شفايفي
نسيت طرقها خالص
بصيت كويس
لاقيت شعري الأسود
بقى أبيض شايب،،
عرفت وقتها أن السنين
بتجري بعمري
والتجاعيد بانت وكبرت
قلت خلاص انا كبرت
من كتير همي
ونسيت نفسي وعشت
اللي فاضل من عمري
بين قلمي وتلفوني وكراستي
لغاية أنت يا حلو
لما شرفت
ضحكت الدنيا من جديد
وطلعت شمس نورت أوضتي
وعرفت أن الأمل
اتولد معاك ياحته
من قلب تيته و جدو
وقتها بقى ياتيته
قلت لازم أكون حلوة
في عيون حفيدي
علشان خاطر حبيبي
صبغت شعري وإهتميت بنفسي
علشان خاطرك ياحته من قلب تيته
إهتميت بنفسي وبقيت
أضحك من كل قلبي
وبقيت حياتي شباب في شباب
بوجودك أنت يا قلب تيته
كتبت ليك يا قمر انت
أجمل شعر بأكتبه بقلمي
تعرف يا روحي أنت
كتبته قبل ما تيجي أنت
تنور حياتي وترجع
لي ضحكتي اللي سابتني
من بدري
إيه رايك بقى يا روح
قلب تيته
أنا خبيت شعري الأبيض
علشان خاطر عيونك أنت
وخسيت كمان
علشان أعرف ألعب
معاك وأجري
وتعرف جدو
قرب يطلع معاش
علشان يا روحي
يخدك في حضنه
ويلعب معاك
وأنا كمان قربت
خلاص أطلع معاش
علشان أخدك في حضني
وألعب معاك براحتي
تعرفي يا روحي أنت
حقيقي أنت رجعتي لي
شبابي وفرحتي
ورجعتيني لعمري اللي جري مني
وفكرتيني بشقاوة بابا
واللي كان بيعمله في تيته و جدو
ماهو برضو كان نور عنيهم
ياه يا حلو ياطعم انت
لو تعرفي أدأيه بحبك
تعرف ياجميل أنت
أنا نفسي أخبيك
جوة في قلبي
وأحفظك بعيد عن
عيون الناس ،،
وأفضل أرقيك في سري،،
عرفت بقى راح فين شعري
الأبيض،
وقصة حياتي،
يا حلو أنت،،
تعرف يوم ماقالو
حبيب قلبي شرف
رقص قلبي جوه صدري
وعرفت وقتها
أن الحياة حلوة
معاك أنت يا روح قلب تيته وجدو
بقلم عبير جلال
مصر ،،الاسكندرية
٢٠/٨/٢٠٢١ الجمعة،،،،
تعليقات
إرسال تعليق