عالحب گتلك البي تضحية يعيش
خذت رايي وسمعته وبية ضحيت
وشفت حفل افتتاح جروحي للناس
وشفتك من بعيد بروحي گصيت
طرت ﭽن دمعة وبجنحينها رموش
وعلى شجرة ضحكتك سكته حطيت
خيل ظنوني طلعت خيل عرجاء
وانا مراهن عليها تفوز ظنيت
من شفتك اطش سنيني والله
لأن بيهن حلا حسبالي جكليت
غشيم وگلت ماساوي اليلمون
عزت نفسي ما خلتني لميت
انا بلا وعي من اطيتك الروح
وعقل ماﭽان عندي وهسة فزيت
ماﭽذب واگلك باﭽر انساك
عفتني وذكريات هوايه خليت
اذا كل حايط البي اسمك يطيح
على هـالحالة لازم نهدم البيت
بأخير ايام عشت بروحك هواي
ديرة شايلين اووحشة حسيت
ظلمة وريح بيها وصوت بيبان
وردت اطلع ولكن ما اندليت
انا الباني السفينة ومو مثل نوح
صعدتك اوبالطوفان ظليت
وجبت عشب الخلود اطيتك اياه
وگلت احمل الفشلة وخالي رديت
بحرگتي وخفت تدريجياً اشتاگ
وخفت ردود گلبي يگلي حنيت
من دمعتي لحجيك وكت الوداع
خط وهمي بوكتها ﺒﭽفي جريت
طلاسم نظرتك فكتها الاعذار
وبعيونك شگد الغاز حليت
ﭽنت ﺘﺤﭽيلي وايدي تهدم احلام
وبمعول دمعتي بقوة دگيت
بحيث من انتهيت من المواضيع
ذيـﭺ الساعة ماظل كلشي هديت
فده من يـﻨﭽفي يگولون عالماي
وفدوة شلون اگلك ماتبديت
انا شفتك ثلج بحلوگ شمات
معقولة بحلگهم ما حتريت
ماگتلي الرواية اخرها مبتور
ﭽا بأول مشاهد مانشديت
ولو ادري اليظل ممنوع مرغوب
لارخصت روحي ولا انذليت
انة ابحرت بيك اعناد عالروج
وعلى خصر الشراع وزار شديت
الهوه هذا اليمرني اتخيلك بي
حته التقي وياك منين ماجيت
يعني بمعنى اخر مستحي احجيه
ترى بس انت غيرك ما اشتميت
وحررت اسمك من شفايف الغير
وعلمودك شگد حروب طبيت
وبعدة ذرائع قادر اجتاح
.ولكن شبر منك ما أحتليت
اكض الليل بيدي من اوگف وياك
بدليل شگد عليك نجوم طشيت
ﭽنت اگدر اجيك بدون عنوان
وحته ادخل بگلبك لو اضطريت
علي محسوب سر وانته مگيول
وعلى ازغر اعدائك ما انظميت
ما عندك عذر ينگال للناس
يمي ومن ﺤﭽيهم؟ ما افتكيت
لهسه اكل بصبعي الاشرت بي
عليك وبي الف نيشان خليت
مثل حب الارض وية الشمس بي
ﭽنت سطحي بنظرتي وفطرة حبيت
لو ادري الشمس ماتفتر وياي
على روحي بعشرتك ما افتريت
انة عابيت حته عيوني ﺒﭽفاك
بيهن وبنظرهن مااعتزيت
مر يم بيتنا مستطرق وشوف
تلگة اباب بيتي عيون ذبيت
انة ظهري احترف طعنات العزاز
وگمت اعرف اديهم لو اندﭽيت
بلا شوف واگلهم ها منو فلان
بس انته عكسهم ماتسميت
حته انساك لازم ينلغي الليل
اذا بالليل اذكرك ﭽا سويت
واحتار من اظل ابين رأيين
اذا عن رأي منهن ما استغنيت
بما انك عفتني بكل الاحوال
ماتفرق نسيتك لو تناسيت
بقلم عمار الشريعي
تعليقات
إرسال تعليق