رسالة إلى الحاضر الغائب
الشاعر الراحل
عبدالرحمن الأبنودي
****************
وحشني صوتك يا عبدالرحمان
(كما كنت تكتبها)
وحشني كلامك
وغناك وحكاويك
وحشني نبرة صوتك الحزين
بيرن في وداني كأنه الأنين
فاكرك عمري مانسيتك
وأنت بتقول اسمع يا واد
محتاج أسمع منك كام جواب
قبل مايفتحوا
المزاد
كام قصيدة
ترد بيها
ع الخونة والأوغاد
أسمع قصايدك عن سينا
والسويس وبور فؤاد
وقصص البطولة ف بور سعيد
وحر أبنود وقسوة حيطان البندر
والحرب والنصر والعتاد
والعسكري شايل على كتافه الأرض والعرض
وانت بتصرخ لما انكسرنا
وأنت بتبكي يوم خسرنا
ولما شفتك يوم عبورنا
وانتصارنا
لما قمنا م الرقاد
مستني لحظة حلوة
تخللي الفرحة تملا بلاد
زمانك كان مسرح للشجاعة والنضال
واحنا عايشين وسط أسراب الجراد
تعرف يعني إيه واحد وسطنا
شبعان فينا شماتة ولو بإيده ها يبيعنا في أحقر مزاد
لأنه مش مننا
لاهو من طينا ولا من نبت أرضنا
وعايزنا نعمل صوان عزا يلف كل البلاد
كنت عاشق لمصر ياعبدالرحمان
مصر دي أصلها
ست الرجال والعجايز والولاد
سمعني صوتك وصحي فينا الضمير اللي مات بالعمالة والعناد
قول للي خان واللي باع واللي نفسه يشوفنا دايما لابسين الحداد
كفاياكم م الخيانة وسيبوا الناس تشم ريحها الطيب شبعنا سواد
وكل صبح يشقشق نطلب لها السلامة من رب العباد
طه هيكل
تعليقات
إرسال تعليق